La titulo di depecho di la AFP atraktas mea regardo: "La tauri sen korni, nova koklusho di la edukisti franca".
Ne timez ke la edukisti esus malada, "koklusho" es uzata quale expresuro idiomala en Franca linguo, e dicas nur ke ula kozo es rapide favorata da grupo de multa personi.
Me tradukas hike parto di la depesho:
" La tauro sen korni, genitorulo de bovini sen korni, "nova koklusho" di la edukisti Franca, esis presentata da la Grupo Mutuala Creavia (kreavia) dum la SPACE (salono di la bestio-eduko) qua eventas en Rennes (ren) til la fino di la semano.
"Per tauri sen korni, vu ganas tempo", dicas la anuncajo di Creavia (kreavia) qua prezentas la "unesma gamo de tauri Franca sen korni", disponebla por la rasi °Prim'Hosltein e Pigo-reda.
Nature, la bovini havas korni ed on sekas olti kande li evas 2/3 monati por evitar ke li vundos acidente o dum krizo de atakeso", explikas Thierry Simon (tieri Simo~), direktoro generala di Creavia, firmo kreata en 2002 de du koopero-societi di la Granda Westo di Francia.
Tamen existas en la naturo kelka bovini sen korni, kauzo da geno partikular. On kopulacigar li kun tauri seminiera por fixigar ta geno inter la geni dominanti. La karaktero dominanta di ta geno permisas lua transmiso plu facile.
[...] "Sekar la korni di bovini, es perdar tempo e korveo por la edukisto" dicis Jean-Pierre Mourocq (Jan Pier Murok), presidero di Creavia e bov-edukisto ipsa. Lu dicis ankor : "Ta tipo de serchado genetikala inskribo se en la evoluco di la profesiono ube la bona stando di la animali es plu atencata kam antee e sekar la korni di la yunbovini esis granda kauzo de °stress por la bestii. Dum la semani sequanta la operaco, ta °stress implikas la min rapideso di la plugrosesko di la bovi."
Selektar per la genetiko e krear quaze nova rasi de bovi, en ta kazo sen korni povas semblar stranja. Tamen la edukisti de tauri de kombato ne facas altra kozo. Certe li serchas tauri kun bona korni, ma la sistemo es sama. La edukisti selektas la bovini per la probo da taureisti en la areno di la farmo, e probis anke tauri seminiera por, pos, kopulacigar selektita bovini kun selektita bovulo por esperar fixigar la geni qui donos bona korni, atakema karaktero, forci kontra la kavalo de pikar e persistemeso de la energio di la animalo dum la kombato.
Ka la tauri de kombato havas hodie, irgafoye, bona korni ?
Me ne povas dicar lo pri irga edukerio, ma dum la yaro 2010, same irga yaro depos multa yari, en Francia, on sekas korni di la tauri pos lua morto por analizar la stando di la keratino. Plura veterinari amiki da me laboris dum lasta semani por skribar la raporto yarala pri la saneso di la korni. On devas savar ke kelkafoye, la korni esis limita fraude. Fraudo existas kelkafoye en la mondo di la korido, same quale en altra aktiveso homala.
Ma ta yaro, forsan la unesma depos la komenco di la sistemo de kontrolo, nula fraudo!
To volas dicar ke irga edukisto qua vendis ta yaro tauri en Francia povas anke facar lo dum la proxima yaro, nam se on probabus fraudo da lu, il ne povos dum minime un yaro, vendar lua tauri por un areno Franca.
On savas ke la nombro de koridi, en Hispania e forsan en Francia esos min granda, pro la krizo ekonomiala, do diversa tauri mortos ne sur la sablo ma inter la muri de la busheyo. Ma po min pekunio kam en areno.
Tamen ne min chero en vua plado.
Til balde
Lenadi