Hiere, sidata komforte en mea favorata fotelo, en la salono di mea domo, en la insulo Atlantikana ube me habitas, per la magio di la televiziono numerala e di la satelito artificala di nia tero, me asistis a la korido en la areno di Madrid. Mirakule, ta ultima spektaklo di la serio di printempo, esis tre bona korido, e mem me lektis pose ke segun numeroza kritikisti, ta esis la maxim bona di la longega periodo di la °San Isidro e °Aniversario di Madrid qua esis ta yaro tante griza.
Me vidis tauri tre bela, kun korni pinta di la fratuli Lozano. La taureeri formigis equipo internaciona : Miguel Abellan, Hispana di Madrid, Jean-Baptiste Jalabert, altre nomizita segun la modeo Hispana Juan-Bautista, Franca di Kamargo, e Arturo Macias, yuna Mexikano qua es ja famozo en lua lando.
Pri lu me ne dicos multa kozi, nam lu ne esas ja sat kustumigata a tala bestii, qui esas plu granda e pezoza kam la Mexikana. Tamen on vidis da lu kelka bela gesti qui facas pensar ke lu povas esor balde tre granda taureero.
Pri Miguel Abellan, quan me konocas ja de longatempe, kontre la unesma tauro, esis extreme kurajoza e volanta, ma ta bestio ne permisis tre bela taureero. Kontre la quaresma tauro (irga taureero luktas kontra du tauri, uno pos l'altru) se lu mortigabis plu bone la animalo, lu certe sekis orelo, nam lu taureis kun certeso e povo, e donis bela serii per la manuo sinistra . On ne ofte vidis ta taureero en Francia ta lasta yari, me prizus ke lu rivenos la proxima yaro en nia areni.
Ma la surprizo di la dio es la du oreli sekita da mea samlandano Juan Bautista.
Ofte lu esas tre eleganta e taureas belege. Ma dum lasta yaro, lu ne esis sempre en lua maxima poseblesi. Tamen, ta vespero, dufoye, lu savis extraktar de lu lua taureo tante eleganta e granda varieso de pasi, lu savis improvizar, taurear tre lente, la manuo tre basa, e obligar la taureo fuganta a restar en la kombato. Dufoye la spektanti di Madrid ekiris la tuko blanka e demandis la orelo por la Franco. Por la sola foyo ta yaro, taureero ye pedo ekiris Las Ventas, la areno di Madrid, per la granda pordo, la °"Puerta Grande", ye shultri di homi.
La rejo Juan Karlos di Hispania kun Juan Bautista a sua dextra e Sebastien Kastella a sua sinistra, pos marveloza korido en Madrid.
Jean Baptiste Jalabert esas la duesma taureero Franca qua ekiris per la Granda Pordo la areno di Madrid, pos Sebastien Castella. Me sublineas to nam ne es hazardo. Nur la rezulto di la granda developo di la tauromakio en Francia. Nun, la korido ne es nur la Festo Nacionala en Hispania, ma ankor fakto kultura en Francia, anke en diversa landi di Amerika, Mexikia, Peru, Bolivia... e mem poke en Chinia. En Francia, ni havas ta du taureeri famoza ed taureeri plu modesta, numeroza yun taureeri, entreprezisti de spektakli taurala, e bovedukisti quale Patrick Laugier qua, stranje, facis kombatar lasta semano yuntauri en Hispania ipsa ! Deo savas ke Hispania ne indijas tauri!
Ne erorez, me ne esas shovinista, e me prizas same taureero Hispanana, Mexikana, Boliviana kam Francana. Me nur volas dicar ke la greftajo tre bone kreskis en la sudo di mea lando e ke hodie ta nova brancho es forsan plu vigoroza kam en kelka provinco di Hispania. Ma fine de junio me esos en la urbo Leon, en la nordo di Hispania por la Festa taurala e pose en julio, en la urbo Mont-de-Marsan, por vidar taueeri Mexikana, Kolombiana, Francana e Hispanana quale la Imperatoro El Juli.
Til balde
Lenadi